【本集提要】
挩窗與阿福在水圳玩得太高興，忘了時間，轉眼天色已晚。
兩人回到村尾的大榕樹下，阿福擔心被罵，不知如何是好。
於是兩人你一言我一語的，想找理由來搪塞，越講越誇張。
鼓起勇氣，阿福推開綠紗門偷偷回家，會不會被阿媽懲罰？
欲暗仔，夕陽共上尾的光抹踮稻穗頂面，隨風搖仔搖，有影清閒美妙。雖然挩窗和阿福的衫仔褲予圳水浸澹，有日頭來熁，略略仔有曝焦矣。
兩人喙咬草仔骨那唸歌，行佇咧軟㽎㽎的田岸仔路，來到阿無庄後尾路的榕仔跤，將爺廟仔頭前，遮是一跡雙叉路口，阿福煞停落來：
「按怎，耍甲傷歡喜，無想欲轉去是無？」挩窗問。
「欲按怎！欲按怎！耍甲傷過頭暗，阿媽凡勢到厝矣，若去予發現我人無佇咧，百面會去予摃啦！害矣啊啦！」阿福講。
「著乎！耍甲傷樂暢煞袂記得你袂當出門。」挩窗嘛起煩惱。
「這聲欲按怎啦？」阿福有影緊張。
「阿福！阿福！免緊張！免煩惱！你聽我講，這馬有兩種可能：第一是恁阿媽猶未轉來，彼就無代誌；假使恁阿媽轉來矣，彼彼彼，就慘矣⋯⋯咱咱咱就揣一个理由⋯⋯著著著，咱就揣一个理由⋯⋯。」換挩窗緊張矣。
「理由無效啦！阮阿媽講，毋管你啥物理由，無講一聲家己旋出去，尻川上少摃十下！」阿福面憂憂。
「敢是抽掃梳笒仔？阮阿媽定定用彼款的呢。」挩窗那講手那比。
「閣較害啦！阮阿媽攏用抓耙仔，毋是用闊彼面摃，是用較𠕇的邊仔彼面，摃著夭壽疼。」阿福的目睭瞪甲大大粒。
「啥物⋯⋯干焦用想的就腫起來矣！」挩窗大喘氣。
「緊來想辦法啦！是你招我出去耍的，去予人拍的是我，你愛負責啦！」阿福大聲喝。
就佇應公廟仔頭前，兩个囡仔戇戇徛咧，頂頭是比ín懸毋知幾十倍的榕仔王公，日頭勻勻仔斜落西，樹葉仔頂面柑仔色的日頭光一塊一塊抽退。落尾，榕仔煞冷凊凊，袂輸火烌，風吹過來，共濟甲算袂清的樹葉仔、佮彼兩隻戇頭戇面的囡仔兄，吹一下凊心。
「按呢傷譀啦，鬼才會信啦！」阿福講。
「啊無閣會當按怎！上少愛揣理由來拄啊！」挩窗講。
「講我睏晝夢遊病，人行出去庄外，跋落水圳，予你發現來共我救起來，衫才會澹澹。這款理由莫講咱人，連彼隻戇毛蟹嘛袂信啦，我看⋯⋯我看⋯⋯我就準備來予阿媽揲啊啦！」阿福講。
「好啦！好啦！你阿媽摃你十下，我分二下。」挩窗開價。
「是你招我去的，你愛扯五下。」阿福講價。
「傷濟，三下啦。」挩窗出價。
五下、三下、五下、三下、五下、三下⋯⋯兩个人講價無相讓。
烏夜無聲無說共規个田洋和庄仔頭包起來，榕仔的色水對青綠綠反烏汁汁。挩窗和阿福行過菜園、鐵厝、竹模，來到龍眼樹下跤，偷偷仔共網仔門㧣開，躡跤尾入去。
隨聽著嗙嗙叫的聲。
「阿媽，以後我不敢啦！」
「你這个死囡仔，走去佗位死！我去廟口、𥴊仔店、菜園攏揣無你！你共我講！你是走去佗位耍啦！真好膽啊你！」
共網仔門捒倒出來，挩窗緊來旋，網仔門倒彈收轉來，挵著手曲，伊人疼一个大聲哀：
哎喲喂啊！！！！
作者簡介：鄭順聰
作家，著有《時刻表》、《家工廠》、《海邊有夠熱情》、《晃遊地》、《基隆的氣味》，《黑白片中要大笑》。最新著作《台語好日子：學台語的第一本書》。
![[講古] 鄭順聰：龍眼樹袂孤單（三）——榕仔雙叉路](news/image/pics/NoPicture_mobile.jpg "[講古] 鄭順聰：龍眼樹袂孤單（三）——榕仔雙叉路")