[講古] 鄭順聰：龍眼樹袂孤單（一）——聲音佗位來

聲音：鄭順聰 

文字：鄭順聰

 

（按play播放聲音）  

---

【本集提要】

好不容易放暑假了，挩窗跑到廟口的廣場，竟然一個玩伴都沒。

失望的挩窗爬到石獅子背上等，打開耳朵，聽到吹直笛的聲音。

他循著聲音，曲曲折折來到龍眼樹下的紅磚房，發現同齡孩子！

挩窗斗膽敲門拜訪，打開綠紗門，也打開了一段曲折的故事⋯⋯

---

【內文】

 

挩窗歇熱註歇熱（hioh-jua̍h/lua̍h）：放暑假。矣！

衝去廟埕揣囡仔伴註囡仔伴（gín-á-phuānn）：玩伴。，連半條人影攏無，跳去石獅仔的尻脊骿註尻脊骿（kha-tsiah-phiann）：背部。等待，干焦聽著放粉鳥歕的觱仔註觱仔（pi-á）：哨子。聲，誠無聊；無蓋遠的所在，若有人佇咧練phín-á 註笛子，此文指直笛。⋯⋯

 

挩窗吐大氣：「怎會無人來摻我耍啊！」

 

這時，傳來「Pa-Pu！Pa-Pu！」的聲音，挩窗精神來矣，去摸橐袋仔註橐袋仔（lak-tē-á）：口袋。，啥物攏無，目睭金金看賣冰的阿伯仔騎跤踏車勻勻仔過：Pa-Pu！Pa-Pu！Pa-Pu！

 

雄雄想起來，樂器愛有人歕，聲才會霆註霆（tân）：鳴響。，彼咧佇廟埕迴響的phín-á聲呢？干焦小學生才會歕直笛，伊是啥？為何無欲來廟埕耍？

 

phín-á聲袂輸一條線，共挩窗牽去廟後壁，踅過鼓井，和五隻拄出世的貓仔囝相對看註對看（tuì-khuànn）：相互觀看。，迒水溝仔、鑽紅瓦厝，佇一排紅艷青翠註紅艷青翠（âng-iām- tsenn/tsinn-tshuì）：顏色繽紛，奼紫嫣紅。的花坩註花坩（hue-khann）：花盆（hue-phûn）。盡尾，一欉龍眼樹徛佇遐，子結甲規捾註規捾（kui kuānn）：整串整串的。規捾。

 

樹欉下跤的低厝仔螿蜍註螿蜍（tsiunn-tsî）：蟾蜍。覆咧彼款形，青色的網仔門內底，挩窗看著，一个囡仔兄當咧歕phín-á：

 

「請問⋯⋯敢有人佇咧？」挩窗相借問註相借問（sio-tsioh- mn̄g）：問候。。

「啥啊？請入來！」

「你好，我叫挩窗⋯⋯」伊開網仔門入去，發出「i-uai、i-uai」的聲。

「你好，我叫阿福，是龍眼阿媽的孫。」

「你敢有來過阮阿無庄？我毋捌看過你啊！」

「見若註見若（kìnn-nā）：凡是，只要。放假，阮爸爸就會載我來阿媽遮。毋過，阮阿媽不準我出去耍。」講啊講，阿福就去歕phín-á矣。

「啊，我知，這條號做『紫竹調』，蓋好聽喔！」挩窗綴旋律來拍拍註拍拍（phah-phik）：打拍子。。

   

風微微透龍眼樹，微微仔透網仔窗，透入去客廳，清涼四序，頭鬃黑㽎㽎、皮膚白拋拋、肨奶註肨奶（hàng-ling/ni）：嬰兒肥，白白胖胖的。肨奶的阿福，𥰔仔歕起來，身軀搖搖擺擺，指頭仔不止仔扭掠，挩窗真欣羨，閣感覺怪奇——但佗位奇怪，一時講袂出來。

 

最後的尾音煞，阿福共手收去尻川斗註尻川斗（kha-tshng-táu）：屁股。後壁，勻勻仔行禮，挩窗拍噗仔。

 

「啥人來矣？」龍眼阿嬤按內底行出來，目睭沙微註沙微（sa-bui）：瞇眼，睡眼惺忪。沙微。

「你好，我叫挩窗，寶釵是阮阿媽啦。」挩窗應。

「哼！我知啦！你來創啥？」龍眼阿媽反白睚註反白睚（píng-pe̍h-kâinn）：翻白眼。。

「廟埕攏無囡仔，一个攏沒，真無聊啊！聽著𥰔仔聲，我揣著阿福，想欲招伊同齊去耍。」挩窗嘛共手收去尻川斗後壁。

「來阮兜耍可以，毋個，不準共伊𤆬出去外口耍。」龍眼阿嬤面色歹看。

「為啥物？廟埕有足濟好耍的，咱庄欲去溪底遐的田洋、水圳閣較刺激啊！今遮爾仔好天，為啥物無愛予阿福出去啊？」挩窗按呢問，阿福人勼踮厝角。

「我干焦阿福這个金孫，伊爸母佇夜市仔做生意，若無閒就載來我遮。伊身體荏註荏（lám）：虛弱。，定破病，人閣夭壽賤註賤（tsiān）：好動、調皮。 ！你無看著伊的倒手，佮街仔的厝邊偷旋去工場耍，手賤無代無誌烏白摸，lōng-tòng一聲，尾指註尾指（bué-tsáinn）：小指。就去予絞斷去。」

 

龍眼阿媽按呢講，挩窗才發現，阿福歕phín-á的時陣，倒手的尾指是用袂著，煞會綴板嘹註板嘹（pán-liâu）：節拍。振動，原來阿福尾指斷一橛註橛（kue̍h）：一截。，莫怪感覺怪奇。

 

「啊好佳哉是倒手的尾指，鋼琴是袂彈得，phín-á閣會當。」阿福細聲講。

「彼意外予阮囝、新婦足傷心的，我是氣甲掠狂，自彼時就禁止伊出去耍。挩窗，若欲耍去揣別的囡仔，莫害阮阿福。」龍眼阿媽歹聲嗽註歹聲嗽（pháinn-siann-sàu）：疾言厲色。。

規个阿無庄的人攏知，龍眼阿媽性地䆀甲無底，挩窗倒退兩步，網仔門拄開，斡頭起跤旋。

 

隔轉工註隔轉工（keh-tńg-kang）：翌日，隔日。，挩窗等規晡，廟埕猶原無𨑨迌仔伴。挩窗擋袂牢，偷偷仔走去龍眼樹跤，聽著摔箸的聲。

「我無愛食。」

「緊食。」

「我袂枵！」

「莫佇咧揣理由！」

「這是昨昏食賰的，煮的攏仝款，足歹食的啊！」

「你這个囡仔傷好命，毋知寶惜，我辛辛苦苦煮飯予你食，閣嫌！」

「敢無捌項！」

「盡想就遐五四三，你四秀仔註四秀仔（sì-siù-á）：零食、零嘴。食傷濟啦！」

「我無愛食你煮的啦！」

 

phòng！

 

 挩窗驚一趒，當欲旋的時陣，瞭註瞭（gió/lió）：瞄一下。著網仔門內底，龍眼阿媽去敲電話：「俊雄，你生彼啥物囝，嫌我煮的飯，閣共我摔門，這囡仔往過真乖啊，這馬怎會遐爾歹𤆬⋯⋯」

 

phòng！

 

日頭光焱焱，吱蟬響上天，袂輸大火燒旺旺。挩窗去抾樹枝，佇半空中亂亂摃，幾粒龍眼落下來，親像歹去的音符。

 

◎挩窗欲按怎共阿福呼出去耍呢？後月日，請期待「龍眼樹袂孤單」第二集：鬥陣出去耍。

---

作者簡介：鄭順聰

 

作家，著有《時刻表》、《家工廠》、《海邊有夠熱情》、《晃遊地》、《基隆的氣味》，《黑白片中要大笑》。最新著作《台語好日子：學台語的第一本書》。