[講古] 鄭順聰：龍眼樹袂孤單（二）——鬥陣出去耍
![[講古] 鄭順聰：龍眼樹袂孤單（二）——鬥陣出去耍](news/image/pics/NoPicture_mobile.jpg "[講古] 鄭順聰：龍眼樹袂孤單（二）——鬥陣出去耍")
聲音：鄭順聰
文字：鄭順聰
【本集提要】
挩窗在廟口等玩伴，眼看龍眼阿媽搭客運離開，逮到好機會去找阿福玩。且不止是在家裡頭，而是拉著阿福斗膽走出戶外，來到田野的水圳旁，跳了下去。兩人玩得正高興時，意外竟又發生了⋯⋯
【內文】
歇熱 註歇熱（hioh-jua̍h/lua̍h）：放暑假。第一工的透早，挩窗起來的第一件代誌，就是去廟口揣𨑨迌仔伴 註𨑨迌仔伴（tshit/thit-thô-á-phuānn）：玩伴。。按呢寬寬仔等，一工一工等，無！就是無！
挩窗真無奈，懶懶覆佇石獅仔的尻脊骿，去看塗跤面的日頭光，對笑黃 註笑黃（tshiò-ng5）：淡黃。落重色變柑仔色，吱蟬嘛綴咧變，對細細仔聲轉做大大聲，ki∼ki∼ki∼ki∼ki ki ki。雄雄忽然間，齊停，廟口恬靜無聲，挩窗聽著彼咧跤步聲，自遠掠近，愈來愈清楚，啊！是龍眼阿媽，手捾加薦 註加薦（ka-tsì）：一種用藺草編成的提袋，後來用塑膠線製作，今泛指小提包。佇大路等，無偌久，就上車坐客運離開。
這時，挩窗聽著phín-á的聲矣！隨起跤 註起跤（khí-kha）：拔腿就跑。行到龍眼樹仔跤，問都無問就共網仔門拄開。
「啊！挩窗，久見久見，真拄好，我有新曲調拄練好，欲來聽看覓無？」阿福問。
「好啊！好啊！」挩窗喙笑目笑註喙笑目笑（tshuì-tshiò-ba̍k-tshiò）：眉開眼笑。。
「按呢我就來表演啊喔！」阿福phín-á攑起來，挩窗斟酌來聽，嘛來綴咧唱：『天頂高高白雲飄飄，太陽當頭微微笑，樹枝鳥仔啾啾咧叫，魚仔躘水真逍遙⋯⋯』」挩窗大聲唱。
「你敢知，這首叫〈歡喜頌〉。」阿福講。
「歕phín-á閣唱歌是真歡喜啦無毋著，毋過，今仔日遐爾仔好天，關踮厝內有影拍損註拍損（phah-sńg）：可惜、惋惜。，不如⋯⋯咱來去外口𨑨迌？」挩窗去幔註幔（mua）：手臂搭在別人肩膀上。阿福的肩胛頭。
「我不敢啦！」阿福人煞勼起來，去摸彼支斷去的尾指。
「喂！喂！我拄才看著恁阿媽坐客運去外位！咱阿無庄的車幫註車幫（tshia-pang）：車次。一工才三、四逝爾爾，久久仔才會轉來啦⋯⋯免驚啦，趁你阿媽無佇咧，咱偷偷仔旋出去耍，好無？你聽，吱蟬的叫聲是遐爾好聽，敢若咧呼註呼（khoo）：吆喝、呼叫。咱出去耍⋯⋯天氣熱罔熱，圳溝的水是蓋清涼，行！來去啦！鬥陣出去耍啦！」挩窗來共姑情註姑情（koo-tsiânn）：懇求、情商、央求。。
「袂當！袂當啦！若是去予阿媽掠著，代誌就大條啊啦！而且，外口的日頭遐爾猛，田洋毋知覕啥物妖魔鬼怪，有夠危險，我毋敢啦！」阿福講。
「無入深山無柴燃註無入深山無柴燃（bô ji̍p tshim-suann bô tshâ hiânn）：不入虎穴，焉得虎子。，你怎會知影危險咧！行！來去！我頓胸坎註頓胸坎（tǹg hing-khám）：拍胸脯。掛保證，百面好耍！」挩窗去搦阿福的手，牽咧就傱對網仔門外口去，對田洋遐去，來到圳溝邊仔，挩窗隨跳落去，阿福佇圳岸躊躇，拄開始毋敢毋敢⋯⋯看挩窗耍水清涼閣自在，阿福嘛擋袂牢矣，共直笛袋入去橐袋仔，人嘛蹽落去註蹽落去（liâu--lo̍h-khì）：入水，走進去。矣，挩窗共戽水註戽水（hòo-tsuí）：潑水。、阿福嘛共戽倒轉去，兩个人愈戽愈緊、笑聲愈來愈響。
「莫講田洋水圳，阮阿媽連廟口一步攏無愛予我踏入去，想袂到，這个所在遮爾仔好耍，水真涼啊⋯⋯」一个無細膩，阿福跙倒註跙倒（tshū-tó）：滑倒。，跋入水中，直笛去予水衝走，阿福隨衝出去共笛身抾轉來，毋過，直笛的頭煞走入去水圳的破空。
「啊！頭走入去矣，去予沖入去空內底，袂當抾，抾袂轉來啊啦！」阿福真驚惶。
「小小仔空爾爾，有啥物好驚的？我替你抾。」挩窗無咧驚。
「袂當，袂當啊！彼時陣我就是戇戇呆呆，指頭仔伸入去，尾指就去予絞斷，痛！夭壽痛！世界痛啊！」阿福面白死殺註白死殺（pe̍h-sí-sat）：臉色蒼白。。
「遮是咱的田地，毋是工廠啦，驚啥貨！」挩窗紲共手伸入去空內底。
「毋通！毋通！千萬毋通啊！」阿福大聲喝咻。
「啊！真正有物件共我鋏！」挩窗面真艱苦。
「敢有影？莫共我騙！」阿福跤軟去矣。
「早知就聽你的話，痛！痛！夭壽痛！」挩窗共手抽出來，大力共hiù，一隻毛蟹siû一聲，飛出去。
阿福啥物攏無看著，干焦共手底架佇目眉頂緣，尾指伸半支，日頭照手影斜面，有所欠缺。
作者簡介：鄭順聰
作家，著有《時刻表》、《家工廠》、《海邊有夠熱情》、《晃遊地》、《基隆的氣味》，《黑白片中要大笑》。最新著作《台語好日子：學台語的第一本書》。