![[講古] 鄭順聰：陷眠機器人](news/image/pics/NoPicture_mobile.jpg "[講古] 鄭順聰：陷眠機器人")
聲音：鄭順聰
文字：鄭順聰
（按play播放講古的聲音檔）
【系列故事背景】
鄭明窗小朋友住在嘉南平原的「阿無庄」，從小由阿媽獨力扶養，在紅磚與稻浪之間嬉戲優遊。由於姓名有個「窗」字，同村長輩暱稱：挩窗的（thuah-thang--ê）。但他眼珠子非但沒有偏斜，而是視力一流，可看到大人看不到的神明、鬼怪與人心幽微。「挩窗去弄險」是鄭順聰一系列台語冒險故事，以挩窗為主角，帶領讀者打開心內的門窗，去看看這個豐饒的世界，找回人該有的勇敢、智慧、善良。
【本集提要】
不知為何，挩窗就被機械人帶入夢中。
「挩窗系列故事」有許多機械人，這一款名為「陷眠」，屬於「眠夢系」。
在夢中，陷眠機械人帶挩窗穿越森林，來到懸崖上，山腳下的巨岩，其實是艘太空船。
機械人展翅如鳥，帶挩窗鑽入太空船裡頭，也進入夢中之夢。
這艘太空船，被悲傷所籠罩，有黑魔王固守，其實相當危險。
既被帶入夢中，挩窗身負任務，這次，是要解決什麼危機呢？
【內文】
「綴我來！」機器人按呢講。
「綴我來！」機器人按呢講。
挩窗毋知發生啥物代，就佇一个生疏註生疏（tshenn/tshinn-soo），陌生，不熟悉。的所在。
「陷眠」 註陷眠（hām-bîn），說夢話，或如夢般神智不清。「陷眠機械人」是挩窗系列的角色之一。機器人閣來揣伊，佇頭前𤆬路，毋知愛出啥物任務，橫直就是綴伊行。
按茂茂的樹仔林軁出來，來到山崁頂註山崁頂（suann-khàm-tíng），山崖之上。，挩窗看著山跤註山跤（suann-kha），山腳。有一粒崙仔註崙仔（lūn-á），小山。，嘛會使講是不止仔註不止仔（put-tsí-á），非常、相當。大粒的石頭，圓圓長長，袂輸拄烘好的麭。
「彼就是太空船！行！來去！」機器人去牽挩窗的手，跳落去山跤，胳耳空註胳耳空（kueh-hīnn-khang），腋下，台灣各地說法不同。到手下節註手下節（tshiú-hā-tsat），前臂。就生薄薄的翼出來。機器人共挩窗偝起來，佇空中飛，寬寬仔降落，對崙仔尾溜的空軁入去。
外口全風飛沙註風飛沙（hong-pue-sua），風沙滾滾。，內底是真清氣 註清氣（tshing-khì），乾淨。，四四角角若現代的辦公大樓。挩窗去摸壁，冷冰冰的玻璃，就來問講：
「咱到底佇佗位？」
「佇悲傷內底。」
幾何線條直溜溜註直溜溜（ti̍t-liu-liu），筆直而長。的巷路尾，是曠闊、挑俍註挑俍（thiau-lāng），挑高。的大廳，敢若巨蛋棒球場遐闊、遐懸。四爿面啥物攏無，干焦阿媽覆佇遐啼啼哭哭。空中有影佇遐浮、踅、切斷了後隨濫做伙，有時烏暗暗，有時光影影。
「這是咧看電影是無，這無成戲園註戲園（hì-hn̂g），戲院。啊！上少嘛有椅仔位和螢幕，遮啥物攏無。」挩窗問。
「這毋是電影院，這是悲傷太空船。」機器人應。
「我聽你佇咧放臭屁！」
「機器人無屁通放，阮食電。」
挩窗pu̍t一聲笑出來，想袂到機器人遮爾仔先進，閣會曉變竅 註變竅（piàn-khiàu），隨機應變、頭腦急轉彎。，佮伊答喙鼓註答喙鼓（tap-tshuì-kóo），鬥嘴。。
「彼！彼！彼！攏是姨媽註姨媽（î-má），姨婆，祖母的姊妹。台語也稱呼叫姨婆（î-pô）。的影啊！機器人你講了無毋著，姨媽頂個月過身註過身（kuè/kè-sin），過世、逝世、死亡。，阿媽有夠傷心。定定佇飯桌仔頭前哭，失神失神，菜煮甲有夠歹食，鹹篤篤 註鹹篤篤（kiâm-tok-tok），味道很鹹。，伊講是人無心情，鹽搣 註搣（me/mi），手捉一把。傷大搣。紲來，菜就無味矣，阿媽傷心甲連調味料攏無想袂下。」
「咱就來救。」
「啥物意思？」
「阿媽去予關佇悲傷的記持 註記持（kì-tî），記憶。當中，咱若無共救出來，伊會去予太空船載離開地球，永遠無法度轉來。」
「欲按怎予阿媽離開悲傷呢？」
「你就愛佇伊身軀邊聽伊講話，講好聽話予伊聽，𤆬伊去外口行行咧，消敨 註消敨（siau-tháu），紓解。鬱卒的心情。毋閣，佇這个夢中，咱愛先共救出來⋯⋯」機器人話講到一半，雄雄地動，四界位轟轟叫：「害啊！太空船欲起飛啊！咱緊來救阿媽！」
挩窗就衝去阿媽遐，人煞無去，塗跤賰一跤銀手指 註一跤手指（tsi̍t kha tshiú-tsí），一只戒指。，挩窗緊共抾起來，當欲旋的時陣⋯⋯恐怖的代誌發生啊！烏鬼鬼的大魔王傱出來，咬牙切齒，吼聲震天，手夯鯊魚劍，就欲去撼 註撼（hám），猛烈重擊。挩窗。
機械人緊共挩窗偝起來，若火箭噴射，掠過烏魔王的胳耳空，按太空船的尻川尾的喙口旋出去。
閣轉來到山崁頂，挩窗目睭金金，看太空船愈飛愈懸、愈飛愈懸，向無頭嘛無尾的外太空遐去。
「向望阿媽的悲傷緊離開地球，莫閣關踮悲傷的太空船啊！」挩窗那講那摸手指。
「人的眠夢終其尾註終其尾（tsiong-kî-bué/bé）：最終、終究。會精神，阮陷眠機器人永遠袂精神啊！」機器人真無奈。
「啥物時陣欲予我精神啊？」
挩窗真悾歁 註悾歁（khong-khám），真是笨蛋啊！，敢問這个問題，機器人就共捙落去山崁，這場夢就來煞！
作者簡介：鄭順聰
作者簡介：鄭順聰
作家。著有《時刻表》、《家工廠》、《海邊有夠熱情》、《晃遊地》、《基隆的氣味》、《黑白片中要大笑》。現正於ＳＯＳ連載台語神怪冒險小說：挩窗去弄險。